Obxectivo

O obxectivo principal desta actividade é fomentar a práctica deportiva nas nenas e nenos, promovendo un estilo de vida activo e saudable desde unha idade temperá. A través da participación nesta modalidade deportiva os nenos poderán desenvolver as súas habilidades físicas, motoras, sociais e emocionais, ademais de aprender valores importantes como o traballo en equipo, a disciplina e o respecto.

Obxectivos específicos

• Aprender técnicas avanzadas. Ensinar aos nenos os golpes complexos do bádminton de maneira progresiva.
• Desenvolver habilidades motrices. Mellorar a coordinación, a psicomotricidade e a axilidade dos nenos a través do bádminton.
• Fomentar o traballo en equipo e a deportividade. Inculcar nos nenos valores como a cooperación, o respecto e a comunicación a través da práctica do bádminton en parellas ou grupos. Fomentar o fairplay no deporte.
• Promover hábitos saudables. Incentivar nos nenos a importancia da actividade física para a saúde e o benestar.
• Gozar do deporte. Crear un ambiente positivo e divertido onde os nenos disfruten aprendendo e practicando bádminton.

Destinatarios/as

Esta actividade ofértase para nenos e nenas de idades comprendidas entre os 6 e os 16 anos en grupos segmentados de idade (6 a 10 anos, 11 a 12 anos, 13 a 14 anos e 15 a 16 anos).

Desenvolvemento

A actividade ofértase en 8 agrupamentos de 8 participantes, cunha acción regular de tres sesións de 1 hora por semana en tres días alternos en dous períodos posibles (uns grupos comezan o 2 de agosto e outros o 3 de setembro, todos rematan o 15 de novembro). As sesións desenvolvidas de luns a venres realízanse en horario de tarde e as sesións desenvolvidas os sábados realízanse en horario de mañá.

O horario da actividade, o número de participantes por grupo e a duración en semanas/quincenas ben determinada pola dispoñibilidade e capacidade da instalación, habendo grupos nos que a actividade ofértase dende o mes de agosto realizando conciliación nos meses de verán e outros grupos a partir de setembro coincidindo co inicio do curso académico 2024-2025.

As sesións serán formuladas de xeito lúdico e de dificultade progresiva para que supoñan reto e motivación para os participantes. Estamos falando dunha disciplina, o bádminton, que pode ser practicada por todo tipo de persoa con independencia das súas características ou experiencias previas. Recoméndase para esta actividade ter practicado bádminton previamente e coñecer os agarres, golpes e desprazamentos básicos.

A programación das sesións será determinada polos coordinadores e coordinadoras que participan no Plan Corresponsables en nome da Federación Galega de Bádminton ou dos clubs que exercen de entidades colaboradoras, tendo en consideración a duración (número de sesións que se ofertan) de cada grupo.

Os contidos que orientan a organización destas sesións son os seguintes:

• Equipamento de tecnificación: cordaxe, grip, raqueta, zapatillas.
• Perfeccionamento do servicio: práctica dos diferentes tipos de servizo (o saque curto, o saque longo, saque de revés), estratexias de saque en individual e dobres, técnica correcta para realizar un bo servicio, as regras das faltas de saque en distintas competicións.
• Golpes avanzados: exercizos para mellorar e dominar os golpes básicos (clear, drop, smash, drive), aprendizaxe de golpes avanzados esenciais para elevar o nivel de xogo (jump smash, deception drop shot, attacking clear, net kill, reverse slice drop shot, flick serve).
• Desprazamento e posición en pista: tipos de desprazamento (laterais, frontais e cara atrás na pista), desprazamentos vinculados aos golpes, posición na pista.
• Estratexias de xogo: estratexias diferenciadas no xogo individual e de dobres, xogadas comúns e como responder a elas, uso eficaz dos golpes.
• Acondicionamento físico e saúde: exercizos de quecemento e estiramentos, exercizos de forza, flexibilidade e resistencia específicos para bádminton, prevención de lesións.
• Torneo de grupo: xogo en parellas e individual con partidos supervisados con regras básicas de bádminton e as súas alternativas (p.e. modalidades de individual e dobres, introdución ao triples, emprego de cartas de acción, rei-de-pista, box, minibádminton...).

As metodoloxías que orientan a práctica destas sesións son:

• Ensinanza directa: explicación e demostración das técnicas, habilidades e regras; e práctica baixo supervisión.
• Aprendizaxe colaborativo: as/os participantes traballan en parellas e pequenos grupos de carácter mixto para practicar habilidades e estratexias, axudándose mutuamente. Implementación de titoría entre iguais.
• Xogo modificado: utilízanse versións simplificadas ou adaptadas do bádminton para facilitar a aprendizaxe e manter o interese das/os participantes.
• Instrucións por estacións: organízanse diferentes áreas polas que os participantes rotan, cada unha con unha actividade específica relacionada con habilidades e aspectos do bádminton.
• Retroalimentación continua: proporcionar comentarios específicos e construtivos durante a práctica para axudar ás/aos participantes a mellorar as súas técnicas e estratexias.